వెన్నెల మళ్లీ వచ్చేసింది కానీ....

"చాంద్ ఫిర్ నిక్‌లా- మగర్ తుమ్ న ఆయే
జలా ఫిర్ మెరా దిల్- కరూ క్యా మై హాయ్''
(మళ్లీ వెన్నెల వచ్చేసింది. కానీ, నువ్వే రాలేదు
మనసంతా కాలిపోతోంది. నేనిప్పుడు ఏం చేయాలో తెలియటం లేదు.)

ఎప్పుడో 1957లో విడుదలైన 'పేయింగ్ గెస్ట్' సినిమాలోని ఈ పాట దేశంలోని కోట్లాది గుండెల్ని పిండేసింది?
దూరంగా ఎక్కడో కొండ గుహల్లో ప్రతిధ్వనిస్తున్నట్లు లతామంగేష్కర్ స్వరం వినిపిస్తోంది. నిజమే మరి! ఆ ప్రియతముడు ఆలస్యంగానైనా వస్తాడో లేదో తెలియదు గానీ, చంద్రుడు మాత్రం వేళకే వేంచేస్తాడు. ప్రియతముడికి ఉన్నన్ని బాధలు చంద్రుడికి కూడా ఉండి ఉంటే అతడు కూడా అందరిలాగే కారణాలు చెప్పేవాడు.

అయినా, తెలియక అడుగుతాను? వేళాపాళా లేనిది మీకేనని మనుషుల్ని వెక్కిరించడానికి కాకపోతే సూర్యచంద్రులూ, నక్షత్రాలూ అంత కచ్చితమైన వేళల్ని పాటించడం ఏమిటండీ?తమవైనవన్నీ తమ చేతుల్లోనే ఉండిపోవడం వల్లే కదా ఆ టెక్కు! అన్నింటి మీదా నియంత్రణ ఉంది కాబట్టి అన్నీ తామనుకున్నట్టే జరిగిపోతే జరిగిపోవచ్చు.

కానీ, మనిషి పరిస్థితి వేరు కదా! అతడేమైనా గ్రహమా? నిర్ణీత కక్ష్యలో పరిభ్రమించడానికి, గోడ గడియారమా? నిర్ణీత క్రమంలో లోలకంలా ఊగడానికి. మనిషి జీవితమేమైనా పుస్తకమా? పేజీ తరువాత పేజీ క్రమం తప్పకుండా రావడానికి. అతనికో జీవితం ఉండి ఏడ్చింది కదా! ఇక్కడ అనుకున్నదొకటైతే జరిగేది మరొకటి. జీవితంలో నవ్వించే క్షణాల కన్నా ఏడ్పించేవే ఎక్కువాయె. అర్థం చేసుకోరు? సమయం మించి పోయిందీ అంటే సంజాయిషీ ఇచ్చుకోవలసిందే కదా!

జీవన స్పృహ ఏ క్షణాన ఆత్మలోకి చొరబడుతుందో ఏమో కానీ, నిలువెత్తు నిప్పురవ్వలా ఉన్నవారు సైతం క్షణాల్లో నీరైపోతారు. మందహాసం కనుమరుగై కళ్లల్లో ఆ విషాదం కదలాడుతుంది. ఎవరో ఎందుకు? నాకైతే ఆ ఎదురింటి అమ్మాయిని చూస్తుంటే ఎంతలో ఎంత మార్పు వచ్చేసిందా అనిపిస్తుంది. ఎప్పుడూ తూనీగలా తారాడే ఆ అమ్మాయి ఇటీవలి కాలంలో ఎప్పుడు చూసినా ఒక శోకమూర్తిలా కనిపిస్తోంది. అనుకున్నవి అనుకున్నట్లే జరిగిన న్ని రోజులు ఎవరైనా తూనీగలే.

వికటించినప్పుడు కదా సమస్య. పరిస్థితులు ఎంతో కొంత తన అధీనంలోనే ఉన్నట్టు మనిషి అనుకుంటాడే కానీ, అంత నియంత్రణలో ఎప్పుడుంది కనుక! కాకపోతే ఆ ప్రతికూల పరిస్థితుల్లోనూ తనను తాను సంభాళించుకునే శక్తి మాత్రం అతనికి ఉంటుంది. నిజానికి గ్రహాల గమనంలో ఏ కాస్త తేడా వచ్చినా విశ్వాంతరాళమంతా క్షణాల్లో తునాతునకలైపోవచ్చేమో కానీ, ఎన్ని తేడాలు వచ్చినా మనిషి చాలా సార్లు ఆ విధ్వంసాన్ని నిలువరించే ప్రయత్నం చేయగలడు. కాకపోతే తన ప్రతి ప్రయత్నమూ ఫలించకపోవచ్చు. ఆ విషాదాన్ని ఆపలేకపోవచ్చు. లేదా మన ప్రయత్నానికి ఏ మాత్రం అవకాశం ఇవ్వకుండానే కొన్ని విషాదాలు జరిగిపోవచ్చు.

అలాంటి సంఘటనేదో జరిగిపోవడం వల్లే కదా ఆ అమ్మాయి ఒక శోకమూర్తిలా మారిపోయింది. అప్పటి నుంచే కదా సూర్యుడు అస్తమించగానే డాబా మీదికి వచ్చి అదేపనిగా ఆకాశాన్నీ, నేలనూ తేరిపార చూస్తూ ఉంటుంది.

తమలో భాగమై తమ చుట్టే పరిభ్రమిస్తూ తమను ఆవరించుకుని తమ మధ్య తిరగాడిన ఆ వెన్నెలను తలుచుకుంటూ ఎంత సేపు అలా ఉండిపోతుందో తెలియదు. ఆమె డాబా మీదికి వచ్చి అలా ఆకాశంలోకి తదేకంగా చూస్తున్నప్పుడు ఎంత కాదనుకున్నా మనసులో ఆ పాటే వినిపిస్తూ ఉంటుంది. నిజంగా ఆ పాటలోని ఏ పాదం విన్నా మనసు ఇట్టే కరిగి నీరైపోతుంది.

ఈ రోజులింక ముగిసినట్లేనని ఈ రేయి అంటోంది.
నువ్వు నాకింక లేవని నా మనసుకు కూడా తెలిసిపోయింది.
అయినా నా చూపులు పరిచి నీకోసం ఇక్కడే నిలుచున్నాను.
అయ్యో నేనింకేం చేయగలను? నువ్వేమో జ్ఞాపకం వస్తున్నావాయె!
ఎక్కడైతే మాటలు ఆగిపోతాయో అక్కడ పాటలు మొదలవుతాయి అంటారు. అంత భావోద్వేగాన్ని వ్యక్తం చేయడానికి మామూలు మాటలేం సరిపోతాయి. అందుకే పాట ప్రవేశించింది.

మండుతున్న నా ఎదలోంచి పొగలేవో లేస్తున్నాయి
ఇకనన్నా వచ్చేసేయ్ నా శ్వాస విలవిల్లాడుతోంది.
వసంతాల నీడలే నా దేహాన్ని కాల్చేశాయి
అయ్యో నేనింకేం చేయగలను? నువ్వేమో జ్ఞాపకం వస్తున్నావాయె!
గుండె మండిపోతున్నప్పుడు గ్రీష్మరుతువే కానక్కర లేదు. ఒకోసారి వసంతాలు కూడా అగ్నికురుస్తాయి. ఆ భావమే ఈ పాటలో ధ్వనిస్తోంది. జీవితం అక్షర బద్ధమై ఇలా ప్రవహిస్తుంది.

- బమ్మెర

ఫోన్ పాడితే జేబు నిండుతుంది!

"అనిత అని టైప్ చేసి 56263 నెంబరుకు ఎస్ఎంఎస్ చేయండి. మీరు కోరుకున్న పాట క్షణాల్లో డౌన్‌లోడ్ అయిపోతుంది..'' ఒక చిన్న సమాచారం విద్యుత్ వేగంతో జనాల్లోకి వెళ్లిపోయింది. ఒకటి.. రెండు.. మూడు.. వెయ్యి.. పదివేలు.. యాభైవేలు.. లక్ష.. పది లక్షలు.. ఇరవై నాలుగు లక్షల మంది స్పందించారు.

వామ్మో! ఈ అంకెలను చూసి మీకే కాదు, పంపన త్రినాథ్‌కూ దిమ్మతిరిగింది. 'అనితా ఓ అనితా' అనే ప్రైవేటు ఆల్బమ్‌లోని పాటను డౌన్‌లోడ్ చేసుకున్న వాళ్ల సంఖ్య అది. అక్షరాలా ఇరవై నాలుగు లక్షల మంది. ఒకర్ని చూసి మరొకరు. వాళ్లను చూసి ఇంకొందరు. ఏ కుర్రాడి జేబులో సెల్‌మోగినా ఇదే పాట. ఇంతకూ ఆ పాటలో ఏముంది..? ఎన్నో మధురమైన సినీ గీతాలుండగా, ఈ పాటంటేనే జనాలకు ఎందుకంత పిచ్చి..? అని మీరు కొట్టిపారేయవచ్చు.

అంటే ఆ పిచ్చినే వ్యాపారం చేసుకుంటే ఎలాగుంటుంది..? అనే ఆలోచన మీ బుర్రకు రాలేదన్న మాట. త్రినాథ్ బుర్రకు వచ్చింది. 'కాలర్‌ట్యూన్ల' వ్యాపారంలో అది కేక పుట్టించింది. "ఎప్పుడు ఏ గాలి వీస్తుందో ఎవ్వరికీ తెలీదు. గాలి వీసినప్పుడే తూర్పారబట్టుకోవాలి...'' పంట నూర్పిడి సూత్రాన్నే వ్యాపారానికి అన్వయించిన ఈ కుర్రాడు చదువుకుంది మళ్లీ ఐఐటీనో, ఐఐఎంనో కూడా కాదు. బీఏకంటే వీసమెత్తు మెరుగైన బీకాం అయిందనిపించాడు.
సినిమాల నుంచి వెనక్కి..
అందరి కుర్రాళ్లలాగే త్రినాథ్‌కూ సినిమాల పిచ్చి. తూర్పుగోదావరి జిల్లా గొల్లప్రోలు మండలంలోని దుర్గాడ నుంచి చెన్నై చెక్కేశాడు. అమ్మానాన్నలది సాధారణ రైతు కుటుంబం. "నాకు చిన్నప్పటి నుంచి సినిమాలంటే యమక్రేజ్. నా సినిమా కలలు సాధ్యం కావాలంటే నా వయసు, అనుభవం సరిపోవని చెన్నై వెళ్లాక తెలిసింది..'' అంటున్న త్రినాథ్ ఒట్టి చేతులతో వెనక్కి రాలేక అక్కడే డీఎఫ్‌టెక్ డిప్లమో చేశాడు.

తర్వాత పెట్టేబేడా సర్దుకుని మన హైదరాబాద్ వచ్చేశాడు. అక్కడక్కడ అసిస్టెంట్ డైరెక్టర్‌గా చక్కర్లు కొట్టాడు. ఉప్పలపాటి నారాయణరావు దగ్గర కొంతకాలం పనిచేశాడు. ఎంతకాలం ఇలా...? తనే సొంతంగా వ్యాపారంలోకి దిగితే, ఆ మాటే తమిళ స్నేహితులతో చెబుతుండేవాడు.

దేశమంతా తిరిగి..
అప్పటికే వాళ్లు యాడ్ఏజెన్సీలు పెట్టి సక్సెస్ అయ్యారు. "నీ ఆలోచనల్లో కొత్తదనం, తపన ఉన్నాయి. చురుగ్గా స్పందించే గుణం ఉంది. నువ్వు కూడా సృజనాత్మకరంగంలోకి అడుగుపెట్టు'' అని ఎప్పుడూ ఉచిత సలహాలు ఇచ్చే స్నేహితులు ఈసారి ఖరీదు సలహా ఇచ్చారు. కానీ, తన దగ్గర పెద్దగా పెట్టుబడి లేదు. ఉన్నది ఒక్క ఆత్మవిశ్వాసమే.

అదే తన పెట్టుబడి అనుకున్నాడు. నేరుగా హైదరాబాద్‌లోని చందనాబ్రదర్స్ యజమాని దగ్గరికి వెళ్లి, 'సార్, ఒట్టి అడ్వర్‌టైజ్‌మెంట్లు ఇస్తే తక్కువ మందే చూస్తారు. ప్రజలకు ఉపయోగపడే సమాచారంతో సీడీలు తయారుచేసి, అందులో ప్రకటనలు ఇస్తే మీ సంస్థ గురించి చాలా కుటుంబాలకు తెలుస్తుంది..' అన్నాడు. ఆయన 'సరే, ఒక్కసారి చేసివ్వు చూద్దాం' అన్నారు.

ఒక వీడియో కెమెరా భుజాన తగిలించుకొని ఇండియా మొత్తం చుట్టేసి 'ద్వాదశ జ్యోతిర్లింగాలు' సీడీని ఆయన చేతుల్లో పెట్టాడు త్రినాథ్. అది ఆయనకు తెగ నచ్చింది. ఇంకేముంది..? ఏటా రెండు లక్షల సీడీలు రికార్డు చేసి చందనా వాళ్లకిచ్చే ఆర్డర్ దక్కించుకున్నాడు త్రినాథ్. అక్కడి నుంచి మరికొన్ని మన రాష్ట్రంలోని 'పంచారామక్షేత్రాలు', 'గోదావరి' సీడీలను ప్రమోషన్ కింద కొన్ని సంస్థలకు తయారుచేసిచ్చాడు. అవి కూడా ఏటా కనీసం రెండు లక్షల సీడీలు చేసివ్వాలి. ఈసారి సొంతంగా సీడీ మానుఫాక్చరింగ్ యూనిట్ పెట్టాడు. పట్టుదల+ఆత్మవిశ్వాసం కలిశాక జీవితంలో కొత్తరుచి దొరికింది త్రినాథ్‌కు. 'మై3 ఆడియో అండ్ వీడియో'సంస్థ ప్రాణం పోసుకుంది.

కాలర్‌ట్యూన్‌ల నాడి పట్టుకొని..
ఇరవైఏడేళ్ల ఈ కుర్రాడికి తోటి కుర్రాళ్ల మనస్తత్వాన్ని పసిగట్టడం చాలా సులువు. తన చిన్న వ్యాపారాన్ని ట్రెండుకు తగ్గట్టు నడపాలనుకున్నాడు. అప్పటికే ప్రముఖ మ్యూజిక్ కంపెనీలు కాలర్‌ట్యూన్, రింగ్‌టోన్‌ల బిజినెస్ చేస్తున్నాయి. రిలీజైన కొత్త సినిమాల ఆడియో హక్కులు ఎంత ఖరీదైనా వారే కొనుక్కుంటున్నారు. 'అంత పోటీలో నువ్వు ఎలా నిలబడదామని అందులోకి దిగావ్..?' అంటే- "నాక్కూడా మొదట్లో అదే భయం కలిగింది.

సంగీతమంటే సినిమాలే కాదు కదా, బయట దొరికే ప్రైవేటు సాంగ్స్, జానపదగేయాలు, పద్యాలు, భక్తి గీతాలు.. వీటి హక్కులు కొని, కాలర్‌ట్యూన్స్ పెడితే ఎలాగుంటుంది..? అన్న ఆలోచన వచ్చింది.

ఏ రాష్ట్రంలో ఎలాంటి కాలర్‌ట్యూన్లు క్లిక్ అవుతున్నాయో తెలుసుకొనేందుకు దక్షణాది ప్రాంతాలన్నీ తిరిగాను. వ్యాపారసంస్థలతో మాట్లాడాను..'' అని చెప్పిన త్రినాథ్ తెలుగులో అప్పటికే ప్రాచుర్యంలో ఉన్న రెండువేల భక్తిగీతాల డిజిటల్ హక్కులను కొనేశాడు. ఈ పాటలు రాష్ట్రంలోని అన్ని దేవుళ్లపై ఉన్నాయి. మరో 40 చిన్న సినిమాల పాటల డిజిటల్ హక్కులను కూడా కొన్నాడు.

కిటుకు కునుక్కొని..
డౌన్‌లోడ్ చేసుకున్న వినియోగదారుడి నుంచి 10 నుంచి 15 రూపాయల దాకా టెలిఫోన్ ఆపరేటర్లకు వెళుతుంది. అందులో డిజిటల్ హక్కులు తీసుకున్న త్రినాథ్ ఖాతాకూ కొంత మొత్తం వెళుతుంది. ఆ కిటుకులన్నీ తెలుసుకున్న త్రినాథ్ ఇప్పటి వరకూ 2,400 కాలర్‌ట్యూన్స్, రింగ్‌టోన్స్‌ను అప్‌లోడ్ చేశాడు. ఇందులో కొన్నే క్లిక్ అయ్యాయి.

"మొదట్లో ఆశించినంత ఫలితం రాలేదు. మన రాష్ట్రంలోని యూత్‌కు వారానికి రెండుసార్లు కాలర్‌ట్యూన్స్ మార్చే అలవాటుంది. వాళ్లకు ఏ పాట నచ్చుతుందో అంచనా వేయడం చాలా కష్టం. "అనితా, ఓ అనితా' ప్రైవేటు ఆల్బమ్‌లోని పాటల్ని విన్నప్పుడు వీటిని కాలర్‌ట్యూన్స్‌గా పెడితే కచ్చితంగా హిట్ అవుతుందనుకున్నా. వెంటనే ఆల్బమ్ చేసిన యువకుడి నుంచి రైట్స్ కొనుక్కున్నా..'' అదే తన దశ తిరిగేలా చేస్తుందని త్రినాథ్ కలలో కూడా ఊహించలేదు.

ఇప్పటివరకు 24 లక్షల మంది ఆ పాటను డౌన్‌లోడ్ చేసుకొని కాలర్‌ట్యూన్‌గా పెట్టుకున్నారు. ఇదొక రికార్డు. టాప్-5 ట్యూన్లలో ఈ పాట చేరిపోయింది. "ఏటా మన రాష్ట్రంలో కాలర్‌ట్యూన్ల వ్యాపారం సుమారు 10 నుంచి 15 కోట్ల రూపాయలు. ట్యూన్లు పెట్టుకుంటున్న వాళ్లు ఎంతమందో తెలుసా రెండు కోట్ల మంది..! ఒకప్పుడు భక్తిపాటలు, సినిమా పాటలు పెట్టుకొనేవారు. ఇప్పుడు తెలంగాణ, బోనాలు, జానపదగేయాలు, తెలుగుతల్లి పాటలు పెట్టుకుంటున్నారు.

తమ వ్యక్తిత్వాన్ని కాలర్‌ట్యూన్స్ ద్వారా అవతలివాళ్లకు వ్యక్తీకరించుకొనే ట్రెండ్ మొదలైంది. మనుషులందరికీ సెల్‌ఫోన్లున్నాయి. వాటికంటే ముందు వారికి ఒక కల్చర్ ఉంది. ఒక బ్యాక్‌గ్రౌండ్ ఉంది. సెంటిమెంట్లున్నాయి. ఎమోషన్లున్నాయి. నా బిజినెస్‌కు ఇవే ముడిసరుకు. ఇన్ని రకాల మనుషులకు ఎన్ని రకాల కాలర్‌ట్యూన్లు కావాలో కనుక్కునే శక్తి మనకున్నంత కాలం.. ఈ బిజినెస్ ఎప్పటికీ ఏదో ఒక కొత్త ట్యూన్‌తో మోగుతూనే ఉంటుంది..'' అంటున్న త్రినాథ్, తన సెల్‌ఫోన్‌కు మాత్రం ఎలాంటి కాలర్‌ట్యూనూ పెట్టుకోలేదు. పక్కా బిజినెస్‌మ్యాన్.

ఎవరప్పా అనొద్దు 'మర్యాద'గా ఉండదు

ఆయన టేబుల్ మీద ఒక క్యాలెండర్ ఉంది. దానిలో జూలై నెల పేజీలో చంద్రమండలం ఫొటో ఉంది. అక్కడున్న ఒక సైన్‌బోర్డును చూస్తుంటాడు ఆస్ట్రోనాట్. దాని మీద 'దిస్ ల్యాండ్ బిలాంగ్స్ టు నాగినీడు' అని ఉంటుంది. 'అరె వాళ్లకా విషయం ముందే ఎలా తెలిసింది సార్' అంటే నాగినీడు నవ్వేశారు. ఎవరీ నాగినీడు అని ఇప్పుడు మీరడిగితే ఏ మాత్రం 'మర్యాద'గా ఉండదు. ఎందుకంటే చాలా ఏళ్ల తర్వాత తెలుగు సినిమా కనుగొన్న సరికొత్త విలన్ ఆయన. 'మర్యాదరామన్న'లో అప్పా అప్పా అంటూ గొంతులు రోసిన రామినీడు.

డజన్లకొద్దీ ఫాక్షన్ సినిమాలు వస్తున్నప్పుడు ఈయన ఎక్కడ ఉన్నాడబ్బా అనుకోకుండా ఉండలేం ఈ అచ్చమైన రాయలసీమ విలన్‌ను చూసినపుడు. నిజానికి ఆయన ఎక్కడో లేడు. సినిమా పనులన్నీ జరిగే ప్రసాద్ ల్యాబ్స్‌లోనే మేనేజర్ కుర్చీలో కూర్చుని ఉన్నాడు. మర్యాదరామన్న వచ్చాకే ఆయన పేరు అందరికీ తెలిసింది. ఇప్పుడు ఆయన డైలాగులు తెలియని వాళ్లు లేరు.

"రా అప్పా.. మా ఆతిథ్యం స్వీకరిద్దువుగానీ'' అనే పిలుపులో ఆప్యాయత. "ఇడిసిపెట్టను. ఆడు గడప దాటి అడుగు బయట పెట్టిన క్షణమే తలా మొండెం వేరవ్వాల... ఇరవై అయిదు సంవత్సరాలుగా ఎదురుచూస్తాండాం. ఇంకొక్క గడియ ఆగలేమా?'' ఆ మాటలో రగిలే పగ.

"రాత బాగుంటే కత్తుల్తో పొడిసినా బాంబులేసినా సావరప్పా. బాగోపోతే చిన్న బ్లేడు ముక్క సాలు మన ప్రాణాలు పోవడానికి'' అంటున్నప్పుడు ఆ కంఠంలో చిన్న విలన్'తత్వం'.

సినిమా చూసి థియేటర్ నుంచి బయటికి వస్తున్న ప్రేక్షకులు కూడా చాలామంది అచ్చు నాగినీడు యాసలోనే "ఏమప్పా! సినిమా ఎట్టాఉండాది?'' అని పలుకరించుకుంటున్నారంటే ఎంత ప్రభావమో చూడండి. ఏదో ఫ్రెష్‌లుక్. 'క్షణక్షణం'లో పరేష్ రావెల్.. 'అంత:పురం'లో ప్రకాష్‌రాజ్.. 'సై'లో ప్రకాష్ రావత్‌ని చూస్తున్న ఫీలింగ్.

కాదు కాదు.. అంతకు మించి ఏదో కొత్తదనం. ఫ్యాక్షన్ నేపథ్య సినిమాల్లో విలన్లుగా పరిచయమైన వారికి మించిన తెలుగుదనం. నుదుట కుంకుమబొట్టు, సగం నెరిసిన జుత్తు, బూడిద రంగు బూర మీసాలు, మెళ్లో బంగారు గొలుసు, పెద్ద రుద్రాక్షమాల, సీమ సంప్రదాయ దుస్తుల్లో కొత్తగా కనిపించారు నాగినీడు. అదంతా రమారాజమౌళి పుణ్యమట.

1967లో ఒకరోజు...
కృష్ణా జిల్లా కలవపాముల గ్రామంలో ఒక ఇంటి డాబాపైన పదిమంది పిల్లలు గుమికూడారు. అందులో ఒక అబ్బాయి అప్పుడే విడుదలైన శ్రీకృష్ణావతారం సినిమా డైలాగులు పొల్లుపోకుండా చెబుతున్నాడు. అది చూసిన మిగిలిన పిల్లలు గంతులేస్తూ చప్పట్లు కొడుతున్నారు. వంటగదిలోకి వినిపిస్తున్న ఆ చప్పుడుకు "ఒరేయ్! బడవల్లారా ఏంట్రా ఆ అల్లరి? వస్తున్నా ఉండండి'' అని ఒకావిడ అరిచింది. అది వినగానే వాళ్లు చెల్లాచెదురుగా పరుగు తీశారు.

ఎన్టీఆర్ డైలాగులు చెప్పిన పిల్లాడి చెవి దొరకబుచ్చుకుని "డైలాగులు బాగా చెబుతున్నావే. సినిమాలోకెళ్లు మంచి హీరో అవుతావు'' అంది. ఆవిడ ఆ పిల్లాడి తల్లి. అంటే నాగినీడు వాళ్ల అమ్మ. వారు ఎల్వీ ప్రసాద్‌కు దగ్గరి బంధువులు. సినిమాల్లోకి వెళ్లాలనుకుంటే ఈజీగా వెళ్లి ఉండొచ్చు. కాని వెళ్లలేదు.

సినిమా పాఠాలు
"నటనలో అనుభవం ఎలా వచ్చింది? ఏదైనా ఇనిస్టిట్యూట్‌లో నేర్చుకున్నారా'' అని అడిగితే నాగినీడు ఇలా చెప్పారు. ఎల్‌కేజి : చెన్నకేశవరెడ్డి సినిమాలో మొదటి వేషం. ఒక రాజకీయనాయకుని పాత్ర. దర్శకుడు వి.వి. వినాయక్ నాకు ఎల్‌కెజీ పాఠాలు నేర్పారు.

గ్రాడ్యుయేషన్ : తమిళ దర్శకుడు తంగర్ బచ్చన్ పల్లికూడం సినిమాలో ఒక కీలకపాత్ర ఇచ్చి నన్ను 'గ్రాడ్యుయేట్'ని చేశారు. ఆ సినిమాకు తమిళనాడు స్టేట్‌ఫిల్మ్ అవార్డు కూడా వచ్చింది.

ఉద్యోగం : 'పల్లికూడం'లో నా నటన చూసి మర్యాదరామన్నలో విలన్‌గా నాకు 'ఉద్యోగం' ఇచ్చారు రాజమౌళి. కొత్తరకం విలన్

షూటింగ్ మొదటిరోజే ఆ పాత్రకు మంచి స్పందన వస్తుందని అందరూ జోస్యం చెప్పారట. అదే నిజమైంది. స్క్రిప్టులో ఉన్న డైలాగులను తనే స్వయంగా సీమ యాసలోకి మార్చుకుని చెప్పి రామినీడు పాత్రకు జీవం పోశారు ఆయన. తెలంగాణా భాషలో డైలాగులు చెప్పడానికి రెడీ అంటున్నారు. భవిష్యత్తులో విలన్ పాత్రలే వేస్తారా అని అడిగినప్పుడు "చాలామంది పోలీసు అవ్వాలనుకుంటారు. కానీ రౌడీ కావాలని ఎవరూ కోరుకోరు.

అలాగే సినిమాల్లో రావాలనుకునేవారు హీరో అవ్వాలనే కోరుకుంటారు కానీ కేవలం విలన్ అవ్వాలని కోరుకోరు. ఒకప్పుడు విలన్లుగా పేరుపొందిన కోట శ్రీనివాసరావు, జయప్రకాశ్ రెడ్డి ఇప్పుడు విలన్లకంటే వేరే పాత్రలు ఎక్కువగా వేస్తున్నారు. హీరోయిన్లలాగ విలన్లు కూడా ఎక్కువకాలం కొనసాగలేరు. నటునికి ఏదైనా చేయగలననే నమ్మకం ఉండాలి కానీ, కేవలం అదే చే స్తాననే హద్దులు ఉండకూడదు.'' అని ముగించారు నాగినీడు.
జూ బీరెడ్డి నగేష్‌రెడ్డి
ఫొటో : జి. భాస్కర్